KQZ në mbledhjen e mbajtur ditën e sotme, ka konfirmuar dhënien e mandatit të deputetit për Pandeli Majkon.
Majko do të zërë vendin e ish deputetit Alqi Bllako në Kuvend, pasi ky i fundit dha dorëheqje nga mandati menjëherë pasi SPAK lëshoi urdhër arresti ndaj tij për përfshirjen në afera korruptive të lidhura me inceneratorët.
Komisioni Qendror i Zgjedhjeve: Ndaj Pandeli Majkos, nuk rezulton të ketë vendime penale të formës së prerë. Pas verifikimeve të kryera, kandiati për deputet, Pandeli Majko nuk përbën kusht për moszgjedhjen e tij. Për sa më sipër mandati i ndëprerë i Alqi Bllakos do i kalojë zotit Pandeli Majko.
Në zgjedhjet e 25 Prillit të viit të kaluar, Majko ishte i renditur i 19-ti në listën e PS në kryeqytet, por nuk e fitoi mandatin e deputetit, duke mos arritur të “thyente” listën. Majko ka përfituar nga mandati i lënë në mes nga Bllako pasi ka siguruar më shumë vota në krahasim me kandidatët e tjerë në listë. Tashmë pritet që KQZ të japë miratimin dhe të lejojë ish-Ministrin për Diasporën të japë kontributin e tij në Kuvend.
Kujtojmë që neni 164 i Kodit Zgjedhor, përcakton se mandati i ndërprerë i deputetit i kalon kandidatit vijues të listës së të njëjtës parti politike në zonën zgjedhore përkatëse, përveçse kur plotësimi i vakancës me kandidatin e radhës ul përfaqësimin e gjinisë së nënpërfaqësuar. Referuar rezultateve të votave në zgjedhjet parlamentare të 25 prillit, janë dy emra që pasojnë rezultatin e Alqi Bllakos. Konkretisht Pandeli Majko me 8780 vota, i renditur në vendin e 19 – të, për tu ndjekur nga Dallëndyshe Bici e listuar në numrin 21 me 4977 vota në total.
