Pas vendimit të KQZ për heqjen e 78 deputetëve nga lista, i menjëhershëm ka qenë reagimi i Partisë Demokratike.
Në deklaratë PD thekson se vendimi i KQZ është i padrejtë dhe i paligjshëm, i diktuar nga interesat politike të maxhorancës.
Kujtojmë se më herët PD depozitoi në këtë instutucion listat me 214 deputetë për zgjedhjet e 25 Prillit.
Në mbledhjen e sotme të KQZ u lejuan vetëm 153, pasi sipas komisionit kaq është numri i lejuar nga Kushtetuta.
DEKLARATË E PARTISË DEMOKRATIKE
Vendimi i sotëm i KQZ për mosregjistrimin e plotë të listave të koalicionit është një vendim i padrejtë dhe i paligjshëm, i diktuar nga interesat politike të maxhorancës.
Pasi ndryshoi rregullat e lojës në mënyrë të njëanshme, maxhoranca synon të imponojë rregulla të tjera, të cilat pamundësojnë përfaqësimin e plotë dhe të drejtë të të gjitha partive përbërëse të koalicionit tonë. Këto rregulla të njëanshme synojnë që të lënë të lënë të papërfaqësuara parti të cilat përfaqësojnë shtresa të ndryshme shoqërore dhe komunitete të caktuara, veçanërisht minoritetet.
Asnjë vendimarrje e tillë nuk ka për të penguar koalicionin tonë që të garojë me potencialin e tij të plotë, njerëzor dhe programor. Kjo vendimarrje, si të gjitha vendimarrjet e padrejta, do të ankimohet menjëherë nga ana jonë në të gjitha shkallët ankimore.
Asgjë nuk do të na ndalojë të sjellim ndryshimin në Shqipëri me njerëzit tanë të mrekullueshëm, që kanë nevojë dhe e duan kaq shumë ndryshimin! Ne do ta bëjmë të mundur këtë në datën 25 Prill me ndihmën e të gjithë shqiptarëve.
