Komisioni Qendror i Zgjedhjeve ka gjobitur me 3 mijë të reja numëruesit që vonuan procesin e numërimit në 18 KZAZ. Gjoba është vendosur pasi ata kanë numëruar më pak se 50% të votave, ndërkohë që 35 KZAZ të tjera kanë arritur të numërojnë më shumë se 50%. Lajmi u bë i ditur në një deklaratë për mediat nga Komisioni Qendror i Zgjedhjeve. Sanksioni është vendosur si pasojë e shkeljes së nenit 122, pika 1 e kodit zgjedhor.
“Numërimi për 35 KZAZ ka arritur mbi 50%, ndërsa 18 KZAZ kanë numëruar më pak se 50%. Komisioneri ka vendosur sanksione me 3000 për të gjitha KZAZ-të ku nuk janë numëruar 50% të votave. Sanksioni është vendosur për mosrepsektim të nenit 122, pika 1 e kodit zgjedhor, ku përcaktohet se tabela parazgjedhore e rezultatit të zgjedhjeve për zonën e administrimit zgjedhor nxirret nga KZAZ jo më vonë se ora 22:00”, thuhet në deklaratën e KQZ.
Ndërkohë, sipas informacioneve të përditësuara nga Komisioni Qendror i Zgjedhjeve, deri tani janë numëruar 3905 qendra votimi nga 5199 që janë në total në të gjithë vendin. Partia Socialiste kryeson aktualisht me 558165 vota që do të thotë 48.77 %. Partia Demokratike ka marrë 449721 ose e përkthyer në përqindje do të thotë 39.30 %. Nga ana tjetër Lëvizja Socialiste për Integrim ka marrë deri tani 78235 ose 6.84 %. E katërta vjen Partia Social Demokrate me 25440 vota.
