Komisioni i Pavarur i Kualifikimit, KPK, shpalli vendimin për konfirmimin në detyrë të prokurorit të Tiranës, Isa Jata. Gjatë seancës dëgjimore, që u zhvillua të martën më 13 korrik, u evidentuan një sërë gjetjesh në kriterin e pasurisë, që përfshinin barrë prove për një kontratë për blerjen e një apartamenti në Golem, nga një koleg prokuror dhe mënyrën se si Jata i kishte deklaruar kursimet.
Prokurori i Tiranës Jata, vlerësoi hetimet e KPK si të thelluara dhe objektive, si dhe theksoi se shpresonte që e kishte përmbysur barrën e provës për ato probleme që ishin gjetur nga Komisioni i Pavarur i Kualifikimit, shkruan BIRN.
Trupa që hetoi prokurorin Jata kryesohej nga Genta Tafa Bungo, me relatore Alma Faskaj dhe anëtar Lulzim Hamitaj. Isa Jata ka një karrierë të gjatë në sistemin e drejtësisë, ku punon që prej vitit 1994. Për më shumë se një dekadë, Jata e ka ushtruar funksionin në Prokurorinë e Përgjithshme, ndërsa prej vitit 2015, punon si prokuror në Prokurorinë e Tiranës.
Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar nga prokurori Isa Jata nga viti 2003 deri në fund të vitit 2016.
