Komisioni i Pavarur i Kualifikimit konfirmoi ditën e sotme në detyrë prokuroren Anisa Qilimi.Ky vendim u mor nga trupa gjykuese: Etleda Çiftja, Xhensila Pine dhe Pamela Qirko.
Pas hetimeve nga ana e KPK-së Qilimi rezultoi e pastër në të tri shtyllat e Vettingut dhe do të vazhdojë të ushtrojë detyrën si prokurore pranë prokurorisë së rrethit Tiranë.Ndërkohë KPK vendosi t’i transferojë 2 çështjet të hetuara nga Qilimi për inspektim pranë Inspektorit të Lartë të Drejtësisë.
Anisa Qilimi ka përfunduar studimet e Shkollës së Magjistraturës në vitin 2007 dhe është emëruar prokurore në Prokurorinë e Krujës. Prej vitit 2014, ajo punon si prokurore pranë Prokurorisë së Rrethit Gjyqësor Tiranë.
NJOFTIMI I PLOTË:
“Komisioni i Pavarur i Kualifikimit njofton se pas shqyrtimit të dokumentacionit dhe zhvillimit të seancës dëgjimore në datën 24.7.2020, për subjektin e rivlerësimit, znj. Anisa Qilimi bazuar në ligjin nr. 84/2016, sot, në datën 28.7.2020, vendosi:
Konfirmimin në detyrë të subjektit të rivlerësimit, znj. Anisa Qilimi, prokurore pranë Prokurorisë sè rrethit Tiranë.
Vendimi i arsyetuar me shkrim nga trupi gjykues i kryesuar nga znj. Etleda Çiftja, znj. Xhensila Pine relatore, znj. Pamela Qirko anëtare, do t’u njoftohet subjektit të rivlerësimit, komisionerëve publikë dhe vëzhguesve ndërkombëtarë brenda 30 ditëve.
Ky vendim mund të ankimohet në Kolegjin e Posaçëm të Apelimit nga subjekti i rivlerësimit dhe/ose Komisioneri Publik 15 ditë nga data e njoftimit të vendimit të Komisionit. Ankimi depozitohet në Komisionin e Pavarur të Kualifikimit.”
