Kolegji i Posaçëm i Apelimit ka dhënë vendimin përfundimtar për shkarkimin nga detyra të prokurores së Shkodrës, Françeskina Lekani.
Vendimi konfirmon atë të dhënë më parë nga Komisioni i Pavarur i Kualifikimit në dhjetor 2023, i cili evidentoi probleme me pasurinë dhe konflikt interesi gjatë ushtrimit të funksionit.
Trupi gjykues i KPA-së, i përbërë nga Natasha Mulaj (kryesuese), Ina Rama (relatore), si dhe anëtarët Albana Shtylla, Rezarta Schuetz dhe Sokol Çomo, vendosi në mënyrë unanime lënien në fuqi të vendimit nr. 721 të datës 6 dhjetor 2023.
KPA vlerësoi se ankimimi i Lekanit nuk solli prova të reja që të rrëzonin konstatimet e mëparshme të KPK-së, ndaj dhe u vendos shkarkimi përfundimtar i saj nga sistemi i drejtësisë.
