Sot, Kolegji i Posaçëm i Apelimit (KPA) vendosi për largimin e kreut të Këshillit të Lartë të Prokurorisë (KLP), Alfred Balla, nga sistemi i drejtësisë. Vendimi u mor pas shqyrtimit të ankimimit nga Komisioneri Publik, duke u argumentuar se Balla nuk duhet të ushtrojë funksione në drejtësi për 15 vitet e ardhshme.
Në vendimin e KPA-së, i lexuar nga anëtarja Ina Rama, thuhet: “Trupi gjykues e gjen të drejtë ankimin e Komisionerit publik duke konkluduar se vendimi i KPK-së është i pabazuar në fakte e ligj dhe si i tillë duhet ndryshuar. Trupi gjykues me shumicë votash vendos ndryshimin e vendimit nr 675 të KPK-së si më poshtë: Ndërprerjen e procesit të rivlerësimit për Alfred Ballën. Subjekti i vlerësimit nuk mund të emërohet gjyqtar apo prokuror i çdo niveli, anëtar i KLP-së apo KLGj-së, inspektor i lartë i drejtësisë apo prokuror i përgjithshëm për një periudhë 15 vjeçare”.
Procesi i rivlerësimit për Ballën ka qenë i gjatë dhe kompleks. Ai filloi pas largimit të tij nga detyra si ndihmës ligjor në Gjykatën e Lartë në vitin 2017, një vendim i marrë nga kreu i atëhershëm i Gjykatës, Xhezair Zaganjori. Balla u bë anëtar dhe më vonë kryetar i KLP-së në vitin 2018. Gjatë kësaj periudhe, ai u përpoq të ndërpriste procedurën e rivlerësimit, duke argumentuar se nuk gëzonte më statusin e ndihmës ligjor për shkaqe që nuk varësinin nga ai.
Edhe pse Gjykata Administrative e Shkallës së Parë në Korrik 2021 vlerësoi se vendimi për shkarkimin e tij ishte absolutisht i pavlefshëm, Balla nuk arriti të rifitojë statusin e tij. Ai kishte paraqitur ankim në Gjykatën Administrative të Apelit, e cila në mars 2023 vendosi të rrëzojë vendimin e Gjykatës së Parë dhe të ndërprejë procesin e tij të rivlerësimit, duke mos i njohur më statusin e ndihmës ligjor.
Ky vendim u kontestua nga Komisioneri Publik, i cili kërkoi që Balla të ndalohet nga ushtrimi i çdo funksioni në drejtësi për 15 vjet, duke argumentuar se ai kishte qenë subjekt i Vetingut kur ligji hyri në fuqi. KPA pranoi këtë kërkesë, duke e larguar zyrtarisht Ballën nga sistemi i drejtësisë.
