Nëna e Sokol Olldashit kujton atë pasditë, kur ai vdiq në aksident. Sonte mbuhen 7 vjet nga humbja e Sokol Olldashit dhe Kozeta Mamaqi e përkujton përmes një mesazhi në rrjetet sociale.
“Sot unë kam vetëm lot, lot malli pafund, dhimbje pafund për ty biri im. 7 vite pritje pafund. Të dua pafund Koli im, kudo qofsh. Unë të kam përditë në kujtime, që nga hapat e parë, belbëzimet e para, e gjer atë mbasdite, që të përcolla”, shkruan nëna e Sokol Olldashit.
Ish-ministri dhe ish-deputeti demokrat humbi jetën gjatë një aksidenti tragjik në aksin Elbasan-Tiranë mbrëmjen e 20 nëntorit 2013.
Sokol Oldashi evitonte në maksimum fluturimet me avion, duke besuar verbërisht se i sigurt ndjehesh vetëm me këmbë ose me rrota mbi tokë. Por ndonëse nuk ishte ndonjë fanatik i teknologjisë, luante me makinën dhe me shpejtësinë, njësoj si me tastierën e kitarës së vet. Sepse ai i binte edhe kitarës dhe këndonte. Olldashi e kishte shndërruar, praktikisht, makinën në një avion të rrezikshëm. Ironia e fatit e deshi, që vdekja ta gjejë, pikërisht, në vendin, ku ai ndjehej më i mbrojtur, se kudo tjetër, në makinë.
Në korrik të atij viti, pas humbjes së zgjedhjeve elektorale nga Partia Demokratike dhe dorëheqjes së Sali Berishës nga posti i kryetarit të Partisë, ai kandidoi për kryetar partie përballë Lulzim Bashës.
/GazetaReforma.com/
