Një ngjarje e rëndë ndodhi në shkollën e fshatit Shirok, në Suharekë, kur një qen pitbull hyri në oborrin e Shkollës Fillore të Mesme të Ulët “17 Shkurti” dhe sulmoi disa nxënës.
Dy prej tyre, që ishin të klasave të para, të dyta, të pesta dhe të gjashta, u dërguan në Spitalin Rajonal të Prizrenit, ndërsa dy të tjerë morën ndihmë mjekësore në Qendrën Kryesore të Mjekësisë Familjare në Suharekë.
Drejtoresha e shkollës, Hidajete Bytyqi, sqaroi se nxënësit janë në gjendje më të mirë, por një nga rastet ka qenë më serioz.
Shefi i Emergjencës në Spitalin e Prizrenit, Hekuran Veçgishti, konfirmoi se nxënësit kishin plagë të shkaktuara nga kafsha.
“Janë përpunu plagët te na. Prej tyre, një është liru, një është pranu në Repartin e Infektives për trajtim të matutjeshëm.” – ka thënë Veçgishti.Gjatë kohës së pushimit të gjatë, nxënësit kanë dalë jashtë hapësirës së shkollës “17 Shkurti” për të blerë ushqim dhe më pas qeni i ka ndjekur pas kthimit të tyre në shkollë – sipas Bytyqit.“Knej rrugës duke ardhë (pasi kanë ble ushqim) i ka ndjek ai qeni, deri në oborr të shkollës. Fëmija tuj vrapu, edhe ai ka hy me atë fëmijë. E ka sulmu atë vajzën të parën. Kanë qenë kujdestarët, po ata derën e kanë mbyllë menjëherë. E kemi neutralizu, mos me lanë prapë me dalë jashtë – derisa erdhën Policia.” – ka treguar Bytyqi.
Pasi kanë njoftuar Policinë, Bytyqi tha se ka ardhur edhe Ndihma e Shpejtë, kurse nxënësit janë shqetësuar shumë dhe u është dashur ta ndërprejnë mësimin për të gjithë.
“Po, po e kemi ndërpre (mësimin). I kemi liru fëmijët, se nuk ke atmosferë e mësimit.” – tha Bytyqi.
