Përfaqësuesja e Kosovës triumfon në transfertën e Lituanisë dhe ruan ecurinë pozitive në Ligën e Kombeve, duke marrë fitoren e dytë radhazi, pas suksesit ndaj Qipros në shtator. “Dardanët” mori tri pikët në fitoren 1-2 ndaj Lituanisë, në takimin e parë të muajit tetor në Ligën e Kombeve.
Skuadra e trajnerit Foda zhbllokoi sfidën në minutën e 20’, me Edon Zhegrovën që zhbllokoi sfidën pas asistit të dhuruar nga Muslija. Lituanezët tentuan të barazonin dhe gjetën rrjetën me Gineitis, por goli i tij u anulua për pozicion të parregullt nga VAR, me Kosovën që e mbylli në avantazh pjesën e parë. Ndërsa në fraksionin e dytë, “dardanët” gjetën edhe njëherë tjetër rrugën drejt rrjetës, me Ermal Krasniqin që shënoi pas asistit të i dha Milot Rashica në minutën e 65’.
Lituanezët provuan të reagonin dhe në minutën e 84’ ngushtuan diferencën me Golubickas, por në fund ishin “dardanët” ata që festuan. Kështu pas takimit të tretë në Ligën e Kombeve, Kosova ngjitet në vendin e dytë të Grupit 2 në Ligën C me gjashtë pikë, teksa Lituania qëndron në vendin e fundit me zero pikë.
