Kosova 11- vjet shtet dhe dita e sotme pritet e festohet ndryshe, kjo sepse është festuar me parakalimin e ushtrisë e cila është në konsolidim e sipër, pavarësisht se mbetet vendi më i izoluar pa liberalizimin e vizave.
Pra është në program që sot FSK-ja do parakalojë zyrtarisht si ushtri dhe kjo mund të jetë një nga gjestet më domethënëse për Kosovën si shtet.
Parakalimi bëhet në sheshet kryesore të Prishtinës, duke filluar nga Sheshi “Zahir Pajaziti” deri të Sheshi “Ibrahim Rugova”.
Më 17 shkurt, 2008, Kosova në koordinim me Shtetet e Bashkuara të Amerikës dhe vendet perëndimore shpalli aktin e pavarësisë, por tani, 11 vjet pas, për herë të parë po rivlerësohet ky partneritet.
Dështimi i Kosovës që të jetë pjesë e Organizatës Botërore të Policisë-INTERPOL, që erdhi si pasojë e fushatës së Serbisë kundër këtij anëtarësimi, solli si kundër-reagim përgjigjen e Qeverisë së Kosovës për vendosjen e tarifës doganore 100 për qind ndaj importeve nga Serbia dhe Bosnjë e Hercegovina.
Sot, ky vendim po e sfidon Kosovën në planin ndërkombëtar, ngaqë Shtetet e Bashkuara të Amerikës dhe Bashkimi Evropian kanë shprehur pakënaqësinë e hapur me tarifën e vendosur nga Prishtina zyrtare, sepse po e shohin atë si pengesë serioze për vazhdimin e dialogut dhe mundësinë për arritjen e një marrëveshjeje historike ndërmjet Kosovës dhe Serbisë.
