Pas deklaratës së ish-kryeministrit të Kosovës, Ramush Haradinaj për formimin e “Shqipërisë së Madhe”, çka nuk vonoi një replikë të presidentit të Serbisë, Aleksandar Vucic, ka reaguar së fundmi edhe Ministria e Jashtë ruse.
Në deklaratën e saj, ku Kosova cilësohet si pseudoshtet i vetëshpallur, deklaratat e Haradinajt konsiderohen një provokim i radhës.
“Këtu po bëhet fjalë për një provokim të radhës, të implikuar në ideologjinë e Shqipërisë së Madhe, e cila kohët e fundit ka përparuar gjithnjë e më intensivisht në rajon dhe kërcënon drejtpërdrejt integritetin territorial të shteteve të Ballkanit. Shantazhi politik është i papranueshëm dhe pikërisht kështu duhet të interpretohet fjalimi i R. Haradinajt, i cili me lehtësi propozon të rishikojë në mënyrë arbitrare kufijtë në Ballkan”, thuhet ne reagimin zyrtar rus.
Më herët Vucic reagoi kështu:
“Nëse ai zgjidhet në ndonjë funksion dhe nëse bashkëpunon me Kurtin është e qartë se ata të dy angazhohen për bashkim. Ne këtë e pranojmë si fakt politik, në çka do të guxojmë të reagojmë.Krijimi i “Shqipërisë së Madhe” është kërcënim për Serbinë dhe BE- në”, e cila u pasua nga kundërpërgjigjja e Haradinajt.
“Për sa kohë i dukem i rrezikshëm Aleksandër Vucicit dhe Serbisë, jemi në rrugë të drejtë! Mos kini frikë, Z. Vucic. Nuk keni nevojë të jeni nervoz. Kosova vetëm po e kërkon atë që i takon. Nëse ju dhe të tjerët dëshironi ta shmangni një referendum mbi bashkimin e Kosovës me Shqipërinë në vitin 2025, ka një mënyrë shumë të thjeshtë: Serbia ta njohë Kosovën si shtet të pavarur”.
