Në një seancë të posaçme në Kuvend, është përkujtuar 25-vjetori i çlirimit të Kosovës. Më 12 qershor 1999, trupat e NATO-s kaluan kufirin dhe hynë në Kosovë, duke shënuar kështu fundin e një periudhe të vështirë për shqiptarët e Kosovës.
“Kjo erdhi pas fushatës 78-ditore të bombardimeve të NATO-s mbi Serbi për të ndaluar spastrimin etnik dhe gjenocidin që shteti serb po kryente mbi shqiptarët në Kosovë,” tha Kryeministri Albin Kurti gjatë fjalës së tij. Ai theksoi rëndësinë e kësaj dite historike dhe rolin vendimtar të NATO-s në çlirimin e Kosovës.
Kryeministri Kurti nënvizoi se, edhe pas 25 vitesh nga çlirimi, Kosova synon të ketë marrëdhënie të mira me fqinjët dhe të forcojë aleancat me vendet partnere. “Të bashkohemi fizikisht e shpirtërisht si sot në Kuvend e sheshet e qyteteve, për të shënuar një ngjarje historike që e ka sjell të tashmen dhe e ka përcaktuar të ardhmen,” tha ai. Kurti theksoi se Kosova është e përkushtuar për të ndjekur rrugën drejt integrimit në BE dhe NATO.
Duke përmendur vuajtjet dhe humbjet e të kaluarës, Kurti theksoi rëndësinë e ndërtimit të një Kosove të lirë dhe të pavarur ku të gjithë qytetarët, pavarësisht prejardhjes, të gëzojnë të drejtat dhe liritë e tyre. “Duam marrëdhënie të mira fqinjësore, e njohje, pa sulme. Kurrë më të lirë e të pavarur nuk kemi qenë,” përfundoi ai.
