Agjencia e Ushqimit dhe Veterinarisë në Kosovë ka ndaluar përkohësisht importin e deleve dhe dhive nga qarqet e Shkodrës dhe Kukësit, pas konfirmimit të shpërthimit të sëmundjes PPR, e njohur ndryshe si murtaja e bagëtive të imta.
Në njoftimin zyrtar, AUV bën të ditur se kufizimi është vendosur si masë parandaluese për të shmangur përhapjen e kësaj sëmundjeje në territorin e Kosovës.
Autoritetet doganore do të rrisin kontrollet në të gjitha pikat kufitare me Shqipërinë për të garantuar mbrojtjen e tufave vendase.
PPR është një sëmundje infektive që prek kryesisht delet dhe dhitë. Transmetimi ndodh përmes kontaktit të drejtpërdrejtë, ndërsa sekrecionet dhe jashtëqitjet e kafshëve të infektuara janë burimet kryesore të përhapjes.
Simptomat përfshijnë temperaturë të lartë, rrjedhje nga hundët, inflamacion të syve, ulje të oreksit, diarre dhe në raste të rënda, ngordhje.
AUV thekson se kjo sëmundje nuk përbën rrezik për shëndetin e njeriut, pasi nuk transmetohet te njerëzit.
Megjithatë, situata do të monitorohet nga afër dhe autoritetet do të informojnë publikun dhe fermerët për çdo zhvillim të ri.
