Agjencia e Ushqimit dhe Veterinarisë në Kosovë ka ndaluar përkohësisht importin e deleve dhe dhive të gjalla nga Maqedonia e Veriut, pas konfirmimit të rasteve me sëmundjen virale “gjuha e kaltër” në këtë shtet.
Vendimi është marrë për të parandaluar përhapjen e virusit në territorin e Kosovës dhe për të mbrojtur shëndetin e kafshëve shtëpiake.
“Nga sot ndalohet importi i ruminantëve të vegjël dele dhe dhi nga Maqedonia e Veriut”, thuhet në njoftimin zyrtar të AUV.
Paralelisht, fermerëve që kullosin kafshët në zonat afër kufirit u kërkohet të tregojnë kujdes maksimal dhe të shmangin kontaktet me tufat që mund të vijnë nga jashtë territorit të Kosovës.
Autoritetet lokale janë ftuar të bashkëpunojnë për zbatimin e masave të kontrollit dhe kufizimin e lëvizjes së kafshëve në brezin kufitar, ndërsa AUV thekson se do të monitorojë nga afër zhvillimet dhe do të ndërmarrë çdo hap të nevojshëm për të parandaluar përhapjen e virusit.
“Gjuha e kaltër” është një sëmundje virale që prek ruminantët shtëpiakë, veçanërisht delet dhe dhitë. Ajo nuk transmetohet drejtpërdrejt nga kafsha te kafsha apo te njeriu, por përhapet përmes insekteve të llojit Culicoides.
Delja konsiderohet më e ndjeshme ndaj kësaj sëmundjeje, ndërsa gjedhët mund të jenë bartës pa simptoma të dukshme.
Fermerët janë të ftuar të respektojnë masat e biosigurisë në fermat e tyre dhe të raportojnë menjëherë çdo ndryshim në gjendjen shëndetësore të kafshëve pranë veterinerit përkatës.
