Tani më shumë se kurrë, kontrabandistët janë duke u përpjekur të fusin mallra pa taksë fare. Kur themi “tani më shumë se kurrë”, bëhet fjalë për taksën që Kosova i ka vendosur mallrave që hyjnë nga Serbia dhe Bosnjë Hercegovina dhe kontrabandistët përpiqen të kalojnë mallrat pa i doganuar. Një tjetër rast është shënuar pikërisht mbrëmjen e kaluar, ku Dogana e Kosovës ka sekuestruar 10 mijë euro mall të kontrabanduar në Komunën e Zubin Potokut.
Sipas Njësive të anti-kontrabandës në Kosovë, raportohet se 95% e mallit që është gjetur ka qenë prodhim serb dhe vija kufitare në veri të vendit mbetet ende një pikë kritike për luftën kundër këtij fenomeni.
Ajo që duhet thënë dhe duhet mbajtur parasysh është se që pas datës 21 nëntor, rastet për të bërë kontrabandë janë dyfishuar, mirëpo vigjilenca është mbajtur në maksimum.
Që nga ajo kohë, vlera e përafërt e mallit të zënë është 116 mijë euro, ndërsa taksa totale 136 mijë euro.
Edhe pse sipas Drejtorit të Doganës, Bahri Berishës, sasia e gjetur nuk është shqetësuese, ai ka kërkuar nga instancat qeveritare që të shtojnë burimet njerëzore në këtë sektor, për të parandaluar raste të tilla në të ardhmen.
