Vendet e Europës po izolohen të gjitha njëra pas tjetrës prej valës së re të koronavirusit që ka pushtuar tashmë kontinentin e vjetër dhe po ashtu edhe ato të rajonit tonë.
Edhe Kosova nuk ka mbetur pas me marrjen e masave të izolimit ku në vend është shpallur karantina e pjesshme. Megjithatë, kjo nuk ka penguar kosovarët që të lëvizin dhe falë injorancës dhe papërgjegjshmërisë së autoriteteve kufitare shqiptare, të penetrojnë edhe në territorin e Shqipërisë në fundjavë, duke eksportuar sasi të madhe infektimesh.
Pas masave të reja kufizuese që ka ndërmarrë Qeveria “Hoti” e Kosovës, kosovarët janë nisur drejt Shqipërisë për të kaluar fundjavën.
Sipas disa fotografive të publikuara në rrjetet sociale, shihet se në vendkalimin kufitar në Morinë, tashmë janë krijuar radhë të gjata të veturave.
Qeveria e Kosovës nxori dje vendimin që në fundjavë t’u ndalohet veprimtaria të gjitha subjekteve afariste dhe bizneseve, qendrave tregtare e rekreative, supermarketeve, subjekteve që ofrojnë shërbimet e gastronomisë (restorantet, kafeteritë dhe të ngjashme) në tërë territorin e Republikës së Kosovës, prej orës 20:00, më 06/11/2020 (e Premte) deri më 09/11/2020 (e Hëne) në orën 05:00.
Po ashtu, Qeveria ka vendosur që të fusë në karantinë shtatë komuna: Prishtinën, Fushë Kosovën, Gjilanin, Obiliqin, Gjakovën, Podujevën dhe Shtimen.
Në këto komuna ndalohet hyrje-dalja e qytetarëve dhe automjeteve private, prej orës 20:00 të dt.06/11/2020 deri në orën 05:00 të dt. 09/11/2020.
/GazetaReforma.com/
