“Kosova është një shtet i pavarur dhe unë e pranoj pavarësinë e saj”. Kjo ka qenë fjalia e deputetit të Parlamentit serb, Nenad Canak që mund të ketë “çmendur” shumë serbë kur e kanë dëgjuar publikisht.
Nenad Canak ka pranuar dhunën e krimet e Serbisë ndaj Kosovës, por edhe ka pohuar faktin se Beogradi nuk do e njohë kurrë pavarësinë e saj, për shkak të politikave.
Deklaratën e tij Canak e ka bërë në një intervistë për televizionin RTK.
“Kosova është shtet i pavarur dhe unë e pranoj pavarësinë e saj. Në Serbi është një politikë se kurrë nuk do të pranojë Kosovën shtet.
Për fat të keq politika e Beogradit ka mbetur e njëjtë, ekzistojnë disa lëvizje pozitive jo vetëm për ngjarjet në Kosovës, por edhe në Bosnjë, por nuk ekziston një masë kritike që do të kishte pranuar në thelb politikën e gabimeve. Krimet nuk vjetërsohen kurrë, krimet po fshihen nën tepih, krimet duhet të zbardhen”, është shprehur Canak.
Ai shtoi se është absurde që edhe 19 vjet pas rënies së Millosheviçit, ende nuk ka lëvizje për të dënuar krimet.
Duke kritikuar me ashpërsi propagandën e Serbisë, ai u shpreh:
“Mua dikur më hoqën mandatin e deputetit vetëm pse bëra disa pyetje për luftën në Kosovë”
Sipas tij nëse nuk do të arrihet një marrëveshje mes dy vendeve, Serbia nuk mund të ecë përpara. Në vitin 2017, Canak ishte kandidat për President në Serbi.
