Korrupsioni në sistemin gjyqësor është një nga plagët më të rënda të shoqërisë sonë dhe sot duhet thënë që është marrë një vendim i rëndësishëm për një rast të tillë.
Bëhet fjalë për rastin e Alban Bucit, i cili akuzohet se është ai që ka ndërmjetësuar dhe dorëzuar ryshfetin në dorën e gjyqtarët Shkëlqim Miri, në mënyrë që ky i fundit t’i lironte mikun, Gentian Dodën.
Për këtë akuzë, prokuroria ditën e sotme ka kërkuar 1 vit e 8 muaj burg për Bucin.
Alban Buci po gjykohej në të njëjtin proces me të dënuarin për vrasje Gentian Doda. Ish gjyqtari i Gjykatës së Apelit në Tiranë, Shkëlqim Miri është dënuar me 2 vit e 6 muaj burg, pasi akuzohet për korrupsion.
Ajo që dyshohet është se gjykatësi me anë të ryshfetit ka bërë të mundur lehtësimin e akuzës për Dodën, i cili akuzohet për vrasje dhe nga vrasje me dashje e ka kthyer më plagosje të rëndë, gjë që i ka mundësuar edhe lirinë. Por kjo nuk do të zgjasë edhe për shumë, sidomos tani që çështja është zbuluar.
Por si u bë i mundur zbulimi i gjithë çështjes?
Pasi dështoi për të provuar korrupsionin në gjykatën e Matit, e cila firmosi për ndryshimin e akuzës për Dodën dhe i hapi rrugën e lirimit të dënuarit, prokuroria nuk e mbylli çështjen, por vendosi ta ndjekë në vijimësi. Në përgjim u vu i dënuari Gentian Dodës, i cili në qelinë e tij mbante dy celularë. Ai komunikonte vazhdimisht me vjehrrin e tij Nezirin dhe mikun e ngushtë Alban Bucin.
“Do të vijë një mik të sjellë 15 mijë. Gjeti dhe 15 të tjera dhe dorëzoji”, i shkruan ai Bucit. Sipas prokurorisë bisedat dhe komunikimet janë përgjatë muajve mars-prill –maj. Pasi ishte rënë dakord për pazarin, sipas të cilit në këmbim të parave vendimi i Matit të mbetej në fuqi, Doda kërkon të dorëzohen paratë, ku si datë caktohet 30 maj. Alban Buci dhe vjehrri i Dodës shkojnë në një lokal në Fushë Krujës, në pronësi të kushëririt të gjykatësit. Në pamjet e kamerave të sigurisë – thuhet në dosje – shfaqen Buci dhe Neziri, të cilët bëjnë dhe dorëzimin e zarfit në duart e Kujtim Mirit. Ky i fundit kushëri i largët me gjykatësin.
Pas këtij momenti Albani i shkruan mikut të tij të dënuar: “Rri pa merak i dorëzuam dokumentet. I thamë skemi gjë tjetër vetëm të japim shpirtin. Do dalësh nga mesi i muajit tjetër”.
