Për herë të parë vitin e ardhshëm do të nisë skanimi i punonjësve të administratës, me qëllim parandalimin e korrupsionit.
Ministria e Drejtësisë do të jetë institucioni i parë që do të miratojë planin e integritetit për punonjësit e saj.
Plani pritet të vihet në zbatim në gjysmën e parë të vitit 2020 dhe pas Ministrisë së Drejtësië do të shtrihet edhe në ministri të tjera e deri në degët e administratës publike.
Nisma financohet nga buxheti i shtetit, SHBA, Suedia, Itali, Zvicra dhe Programi i OKB për zhvillim.
Ashtu siç kanë miratuar programin e transparencës do të miratojnë edhe planin e integritetit, për të parandaluar shkeljet.
Në plan do të përfshihen informacione mbi reagimet institucionale ndaj sjelljeve të punonjësve publikë, pranimin e dhuratave, rastet e korrupsionit, kodin e mirësjelljes, trajtime mbi etikën dhe veprimet disiplinore të regjistruara.
Ecuria e zbatimit do të monitorohet nga Task-Forca Ndërinstitucionale Antikorrupsion, e cila përbëhet nga përfaqësues të kabinetit të kryeministrit, drejtori i Përgjithshëm i Agjencisë së Prokurimit Publik, Inspektori i Përgjithshëm i Inspektoratit Qendror si dhe nga drejtori i Departamentit të Burimeve, Transparencës dhe Administrimit në Kryeministri.
