Koronavirusi me origjinë nga Kina ka tmerruar qytetarët në pothuajse çdo vend të botës.
Alarmi dhe masat e ndërmarra janë të mëdha.
Mesa duket edhe sporti duhet të ndalet. Atletika Botërore deklaroi se vendosi të shtyjë Kampionatin e saj Botëror të Atletikës, që do të zhvillohej në qytetin kinez Nanjing.
Kampionati i planifikuar për 13-15 mars 2020, është caktuar të zhvillohet në mars të vitit 2021.
“Këshilla e ekipit tonë mjekësor, të cilët janë në kontakt me Organizatën Botërore të Shëndetësisë (OBSH), është që përhapja e koronavirusit si brenda ashtu edhe jashtë Kinës është ende në një nivel shqetësues dhe askush nuk duhet të vazhdojë me ndonjë event të madh që mund të shtyhet”, shkruan në një njoftim të sajin organizata.
Pas shtyrjes së kampionatit Botëror të Atletikës, ekipi kombëtar i femrave në futboll është në karantinë në një hotel.
Për shkak të koronavirusit, Federata Kineze e futbollit ka vendosur që për momentin të shtyjë të gjitha ndeshjet e planifikuara për vitin 2020.
Sipas raportimeve të fundit, numri i viktimave ka shkuar në 170, ndërsa flitet për mbi 7700 persona të prekur.
Aktualisht autoritetet kineze në versionin zyrtar, shprehen se virusi është përhapur nga supa me lakuriq nate dhe ushqimi i gjarprit.
Ndërkohë, në kuadër të masave që duhen ndërrmarrë, shumë shtete u kanë kërkuar qytetarëve të tyre të shmangin udhëtimet drejt Kinës.
Për sa i përket Shqipërisë, rreziku i përhapjes së virusit nuk është shqetësues.
Në aeroportin Nënë Tereza janë marrë të gjitha masat e duhura për ekzaminimin e personave që mbërrijnë në Shqipëri nga Kina.
Organizata Botërore e Shëndetësisë pritet të zhvillojë një takim këtë të enjte për të diskutuar nëse ky virus përbën emergjencë shëndetësore globale
