Qeveria rumune është futur në karantinë, pasi një senator rezultoi pozitiv me koronavirus.
Në një konferencë për mediat, kryeministri i përkohshëm Ludovic Orban tha për gazetarët, se të gjithë ministrat dhe zyrtarët që ishin në takimin me të prekurin, do të izolohen nëpër shtëpi.
Orban ditën e djeshme ishte gjithashtu në kontakt me presidentin rumun Klaus Iohannis, përpara se të vetëizolohej.
Më tej ai u bëri thirrje gazetarëve të pranishëm në takim, që të vetëizolohen.
Zyrtarët e Shëndetit, tashmë ndodhen në parlament, dhe po testojnë të gjithë anëtarët e Partisë Kombëtare Liberale, pjesë e së cilës është edhe kryeministri.
Deri më tani, Rumania numëron 70 raste të konfirmuara me koronavirus.
Kryeministri në detyrë ndërkohë, dha urdhër për pezullimin e fluturimeve dhe udhëtimeve me Italinë.
Situata nuk është aspak e mirë edhe në Bullgari, parlamenti i së cilës votoi unanimisht shpalljen e gjendjes së emergjencës, pasi në vend janë regjistruar 23 raste me koronavirus, ndërsa viktima e parë u shënua të mërkurën.
Kryeministri bullgar, Boyko Borissov, u bëri thirrje qytetarëve që të zbatojnë rregullat.
Më tej ai shtoi se qeveria do të alokojë fonde të reja për shëndetësinë, për të përballuar situatën.
