Situata e pandemisë së koronavirusit në Shqipëri është bërë serioze dhe kjo ka vënë në lëvizje jo vetëm ministritë e linjës, por edhe Presidencën.
Nga ambientet e kësaj të fundit, Presidenti Ilir Meta, zhvilloi sot një diskutim me ekspertë të shëndetësisë në vend.
Takimi në dukje krejt normal dhe me qëllim informimin e kreut të shtetit, u pa edhe si një përpjekje e Presidentit Meta, për të vënë në lëvizje ato struktura që sipas tij duhet të jenë më energjike dhe më të efektshme për përballimin e situatës.
Duke theksuar faktin se shumë çështje kërkojnë vëmendje të veçantë, por edhe të tjera mund të ishin më mirë, Meta u tha ekspertëve të shëndetësisë se ata dhanë mendime të vlefshme.
Kohët e fundit kryeministri Rama është parë më i tërhequr në drejtimin e situatës së pandemisë, dhe vendin ja ka lënë Komitetit të Ekspertëve.
Por edhe pse këta të fundit kanë shtuar masat e izolimit, rekomandimet dhe masat e tyre nuk kanë dhënë ende një efekt pozitiv, përkundrazi shifrat e infektimeve dhe vdekjeve janë rritur.
Ish-deputeti i PD-së, një nga mjekët e njohur në vend, Tritan Shehu, tha se, gjendja sot është jashtë kontrollit. Ai theksoi se, duhet të bëhen sa më shumë teste në popullatë.
Ndërsa, mjekët e tjerë deklaruan se duhet vijë zjarri në të gjithë territorin, për shkak të përmasave të kësaj pandemie.
Pjesë nga biseda
Presidenti Ilir Meta: Do të bisedoj sot online me mjekë të vendit, për gjendjen për shkak të rëndë të koronavirusit.
Tritan Shehu: Sot gjendja është jashtë kontrollit, nesër do jetë akoma më jashtë kontrollit, kur të nisin edhe virozat. Shumë pak teste janë bërë. Popullsia duhet të bëjë testime, duhet të ftohet për këtë gjë. Bëhen vetëm 1400 teste, që janë pak.
Petrit Vasili: Strategjia e testimit duhet të jetë perfekt. Duhet të ketë një dekoncentrim të situatës. Është pandemi e duhet vijë zjarri në të gjithë territorin.
Arjan Mezini: Testimi masiv është shumë i rëndësishëm, edhe për shkak të shkëputjes së zinxhirit të infektimit. Vendeve europiane nuk iu ka dalë jashtë kontrollit, por ata po zbulojnë rrënjën e infeksioneve.
Dr Bajram Hysa: Duhet të vihen në punë të gjitha kapacitetet. Mund të merret në konsideratë aktivizimi i studentëve të vitit të gjashtë të mjekësisë.
/GazetaReforma.com/
