Olimpiada e Tokios ka mbetur në hije pasi rastet me koronavirus në kryeqytetin japonez kanë njohur një rritje rekord, duke rritur kritikat ndaj qeverisë për trajtimin e pandemisë.
Ministrja e Shëndetësisë Norihisa Tamura tha se varianti Delta po çon në një përhapje të infeksioneve të padukshme, ndërsa mbrojti një politikë të re për t’i kërkuar pacientëve me simptoma më të buta të izolohen në shtëpi sesa të shkojnë në spital.
“Pandemia ka hyrë në një fazë të re … Nëse nuk kemi shtretër të mjaftueshëm, ne nuk mund t’i sjellim njerëzit në spital. Ne po veprojmë me masa paraprake në këtë front”, tha Tamura në parlament.
Por ajo sinjalizoi shansin për ta tërhequr një nismë të tillë, pasi vendimi për t’u kërkuar disa të sëmurëve të qëndrojnë në shtëpi ka tërhequr kritika nga ekspertët mjekësorë duke vënë jetën në rrezik.
“Nëse gjërat nuk dalin ashtu siç e presim, ne mund ta anulojmë diçka të tillë”, tha Tamura, duke shtuar se ndryshimi i propozuar ishte një lëvizje për t’u marrë me përhapjen e papritur të shpejtë të variantit të ri.
Japonia ka parë një rritje të ndjeshme të rasteve të koronavirusit. Tokio raportoi një rekord 4,166 raste të reja të mërkurën. Në mbarë vendin, rastet e raportuara rishtazi arritën një rekord të ri prej më shumë se 14,200 në ditë, sipas transmetuesit publik NHK.
