Situata e krijuar në Shkodër për shkak të koronavirusit, i ka kushtuar postin prefektit, Çesk Millja.
Ministri i Brendshëm, Sandër Lleshaj, në vendin e tij ka prezantuar Besfort Lamallarin, i cili deri më tani mbante postin e zv. Ministrit të Brendshëm.
Lleshaj tha se ky vendim është marrë nga Këshilli i Ministrave, në kuadër të përpjekjeve për një mbështetje më të madhe për qytetin e Shkodrës.
Ministri i Brendshëm tha se nga ana e prefektit gjatë periudhës së pandemisë, është vërejtur një inerci burokratike e papranueshme dhe një hezitim për të marrë përgjegjësi.
“Nëse ne kemi shprehur rezerva deri tani për gjendjen në Shkodër, kjo nuk do të thotë që të gjithë vërejtjet kanë qenë të adresuara vetëm tek Bashkia.
Ne mënyrën se si kane funksionuar apo nuk kanë funksionuar gjërat në Shkodër kanë ndikimin e tyre edhe drejtues të caktuar degëve territoriale në qark si dhe vetë Prefekti të qarkut si përfaqësuesi më i lartë i qeverisë atje.
Për fat të keq, gjatë kësaj periudhe të pandemisë, është vërejtur një inerci burokratike e papranueshme, një hezitim për të marrë përsipër përgjegjësi dhe mungesë e lidershipit, aq të domosdoshëm, sidomos në situata të tilla, kur drejtuesit duhet të marrin përsipër përgjegjësi për vendime për të cilat jo domosdoshmërisht ekziston ndonjë praktikë e konsoliduar më parë. Situata të tilla kërkojnë iniciativë dhe vendimmarrje. Çdo drejtues vihet përballë situatave të panjohura dhe përballë vendimmarrjeve ndonjëherë të pasigurta. Hezitimi për të vepruar dhe për të vendosur, mund të sjellë shkaktojë mosveprimin i cili sjell pasoja të paparashikueshme.
Ndër të tjera Lleshaj bëri me dije, se prefekti i ri, Lamallari do të ketë gjithashtu detyrën, për të koordinuar të gjithë degët territoriale, për të dalë sa më shpejt nga pandemia.
“Krahas kësaj, z. Lamallari do të ketë detyrën e koordinimit dhe bashkëpunimit me kryetarët e bashkive, në interes të daljes sa më të shpejtë dhe më të lehtë nga gjendja e pandemisë. Sigurisht që komandimi i një zëvendësministri në këtë funksion kaq të rëndësishëm, është shprehje e rëndësisë që Qeveria i kushton administrimit të gjendjes në tërësi e posaçërisht në Shkodër. Z. Lamallari do të ketë në dispozicion të tij jo vetëm institucionin e Prefektit dhe strukturat e degëve territoriale, por edhe gjithë kapacitetet e Ministrisë së Brendshme dhe të strukturave të tjera qendrore në funksion të menaxhimit sa më të mirë të situatës në Shkodër. Kam besim se drejtuesit e bashkive të qarkut do ta vlerësojnë këtë hap të rëndësishëm si shenjë përkujdesjeje të posaçme dhe të një vlerësimi të veçantë që Qeveria dhe Ministria e Brendshme ndjejnë përballë Shkodrës dhe qytetarëve të saj.
Me këtë rast, dua t’ju kërkoj gjithë drejtuesve të bashkive në Qarkun e Shkodrës, gjithë drejtuesve të partive politikë, intelektualëve, medias dhe gjithë atyre që Shkodrën e shohin si kryeqendrën e shumë vlerave shqiptare, që në këto momente të kalojnë në plan të dytë shumë ndjeshmëri të vogla individuale apo partiake për t’u fokusuar vetëm tek Shkodra, e cila është shumë herë më e rëndësishme se të gjitha vogëlsitë, që marrin nganjëherë padrejtësisht vëmendje dhe energji të mëdha”, u shpreh Lleshaj.
Lleshaj u shpreh se qeveria ka shumë plane dhe projekte ambicioze për Shkodrën, ndërsa ftoi të gjithë aktorët që kanë në dorë fatet e Shkodrës, por edhe qytetarët gjithashtu, që të bashkëpunojnë me Lamallarin.
Aktualisht Shkodra numëron 52 të infektuar dhe 1 viktimë, duke u renditur menjëherë pas Tiranës, për numër të prekurish nga COVID-19.
Gjithashtu ndërgjegjvsimi i qytetarëve për rrezikun nga COVID-19 në këtë qark ka qenë tepër i ulët.
