Policia Kufitare në bashkëpunim me Seksionin për Hetimin e Narkotikëve në DVP Korçë parandaluan një tentativë për trafik droge drejt Greqisë, duke sekuestruar rreth 32.3 kilogramë kanabis.
Ngjarja u regjistrua në vijën e gjelbër kufitare mbi fshatrat Vidohovë dhe Ponçarë të Devollit, midis piramidave 43 dhe 44, ku patrullat kufitare konstatuan dy persona që po transportonin dy çanta të dyshuara.
Pasi panë shërbimet e Policisë, personat braktisën çantat dhe u larguan në drejtim të territorit grek.
Nga kontrolli në vendngjarje u zbuluan 20 pako të mbushura me lëndë narkotike me një peshë totale prej 32.3 kilogramësh.
Policia ka identifikuar njërin nga të dyshuarit, ndërkohë që për arsye hetimi nuk janë bërë publike gjeneralitetet e tij.
Vijon puna për identifikimin dhe kapjen e personit tjetër të përfshirë, si dhe të çdo bashkëpunëtori tjetër.
Materialet procedurale i janë referuar Prokurorisë për veprime të mëtejshme.
