Një mësues që jepte mësim në një shkollë jopublike në Korçë ka rezultuar pozitiv në testin e Coronavirusit.
Bëhet fjalë për një shtetas grek që ushtronte profesionin e tij në qytetin e Korçës, teksa nuk dihet ende gjendja e tij.
Sipas informacioneve paraprake, në shkollën jopublike ku ai jepte mësim ka rreth 430 nxënës.
Mësuesi është paraqitur të hënën në shkollë, pas pushimit të fundjavës, dhe është rikthyer po brenda të hënës sërish në Greqi.
Pas disa analizave rutinë në shtetin grek ai ka rezultuar i infektuar me COVID-19 dhe pas mbërritjes së informacionit, një pjesë e mësuesve të shkollës janë vetëkarantinuar, por nuk dihet me sa persona mund të ketë kontaktuar i infektuari.
Mirëpo, prindërit tregoinë se janë njoftuar me një mesazh nga drejtoria e shkollës 4 ditë më vonë nga përgjigja e analizave, duke i alarmuar të gjithë.
Lajmim e ka dhënë gazetarja e “ABC News”, Lediona Xheladinaj, e cila është edhe prind i një prej nxënësve dhe pas lajmit ajo dhe familja e saj u vetëkarantinuan.
Ndër të tjera, gazetarja thekson faktin se mësuesi me Coronavirus ka dhënë mësim para nxënësve edhe sikur të mos mjaftonte kjo, kolegët nuk e dinë se për kë mësues bëhet fjalë.
Në rang botëror deri tani janë shënuar 7,511 viktima dhe janë regjistruar 189,074 të infektuar në 163 shtete, ndërsa në vendin tonë deri tani ka humbur jetën 1 person dhe janë infektuar 55 të tjerë, teksa në Kosovë janë 16 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
