Myslim Murrizi ka bërë sot në Komisionin e Ligjeve prezantimin e një projektligji të ri.
Në këtë projektligj është propozuar përjashtimi nga funksionet drejtuese të zyrtarëve dhe politikanëve të dyshimtë, duke shtuar se këta persona mund të jenë punonjës në administratë, por jo në postet drejtuese.
Murrizi ka kërkuar edhe ndihmën e antarëve të tjerë.
Ndër të tjera, ai ka nxjerrë disa nofka të ish-spiunëve që kanë futur këmbët në politikë dhe përmenden shpeshherë gjatë seancave parlamentare gjatë debateve.
Murrizi ka thënë se koha e tyre duhet të marrë fund njëherë e përgjithmonë dhe të mos jenë pjesë e vendimarrjeve të qytetarëve.
“Unë nuk mund të jem “fair” me drejtësinë e re kur shoh në KLP, KLGJ, Prokurorinë e sotme, ish-kryetarin e hetuesisë së Krujës që duan të jenë apo janë në KLP dhe KLGJ, njerëz që kanë ushtruar funksionet hetuesi dhe oficer në sigurimin e shtetit aspirues për drejtues të kësaj drejtësie shqiptare.
Që tani në moshën 60 e kusur të aspirojnë në këtë poste drejtuese pas 30 vitesh kur kemi shumë studentë që kanë mbaruar pas ’91 fakultetin e drejtësisë.
Jo pak herë në sallën e Parlamentit , në media për interesa meskine kanë bërë shou politik, duke akuzuar si bashkëpunëtorë, madje duke iu përmendur pseudonime si Korani i Myzeqesë, Gaforrja, Çakmaku, Stilolapsi.
Koha e gaforreve, e Çiftelisë e koranit, Çorapeve dhe Rrjepësit duhet të marrë fund një herë e përgjithmonë, që të mos jenë më pjesë e vendimmarrjeve të qytetarëve shqiptarë”, u shpreh Murrizi.
Murrizi u shpreh se nëse një projektligj i tillë miratohej, atëherë më shumë se 300-400 zyrtarë nga 2000 në total që kanë poste drejtuese dhe janë zgjedhur nga Parlamenti në institucionet shtetërore, do të eliminoheshin.
