Para një muaji Rusia publikoi një listë të vendeve “jo miqësore” me të dhe ndër to ishte edhe Shqipëria.
Gjithashtu qeveria ruse në listën e vendeve dhe rajoneve të cilësuara jo miqësore, përfshiu Shtetet e Bashkuara, shtetet anëtare të BE-së, Mbretërinë e Bashkuar, Ukrainën, Japoninë dhe disa vende dhe rajone të tjera.
Por tashme të njëjtin veprim ka bërë edhe Bjellorusia e cila edhe ajo ka publikuar një listë të vendeve që I konsideron “jo miqësore” dhe ndër to ka përfshirë edhe Shqipërinë.
Mësohet se përveç vendeve anëtare të BE-së lista përfshin edhe 12 vende të tjera, si Shtetet e Bashkuara të Amerikës, Britania e Madhe, Australia, Kanadaja, Norvegjia, Zelanda e Re, Shqipëria, Islanda, Maqedonia e Veriut, Lihtenshtajni, Mali i Zi dhe Zvicra. Ndërkaq vendimi hyn në fuqi ditën e publikimit zyrtar.
Kujtojmë që Bjellorusia, një aleat i ngushtë rus, mund të sulmojë së shpejti Ukrainën dhe po përgatitet të lejojë potencialisht Rusinë të pozicionojë armë bërthamore në tokën bjelloruse, sipas një zyrtari të lartë të inteligjencës së NATO-s.
Zyrtari, duke folur në kushte anonimiteti, tha se aleanca është e shqetësuar se trupat bjelloruse mund t’i bashkohen luftës në Ukrainë.
”Qeveria bjelloruse po përgatit mjedisin për të justifikuar një ofensivë bjelloruse kundër Ukrainës dhe vendosjen e afërt të armëve bërthamore ruse në Bjellorusi”, tha zyrtari.
