Prokurori i Përgjithshëm, Olsian Çela, u shpreh se mbledhja e provave nga institucionet publike dhe jo publike, do të ulë kohën e hetimit dhe do të rrisë efikasitetin e drejtësisë në vend. I pranishëm në konferencën e përbashkët për rritjen e bashkëpunimit të institucioneve, Çela tha se koordinimi mes Prokurorisë së Përgjithshme dhe SPAK, do të ndihmojë në shkurtimin e shpenzimeve dhe në rritjen e efektivitetit.
Sa i takon vakancave të përkohshme, Çela sugjeroi shtimin e oficerëve të policisë gjyqësore. “Destinacioni final është shteti ligjor dhe kthimi i besimit të publikut te drejtësia. Janë marrë masa në forcimin e kapaciteteve institucionale sa i takon krimit financiar dhe aseteve financiare. Koordinimi mes PP dhe SPAK do të ndihmojë.
Janë nënshkruar morandume edhe me ILD. Mbledhja e provave nga institucionet publike dhe jopublike do të ulë kohën e hetimit, do të shkurtojë shpenzimet dhe do të rrisë efikasitetin.
Po krijohen vakanca të përkohshme. Shtimi i oficerëve të policisë gjyqësore do të ndihmojë në vakancën e krijuar. KLP dhe PP të japin kontributin në funksion të përmbushjes së punës së prokurorit të Përgjithshëm për mbarëvajtjen”, tha kryeprokurori Olsian Çela ndër të tjera. Ditët e fundit, ka pasur shumë lëvizje në gjykatat e vendit dhe Vettingu po bën “kërdinë” për disa prokurorë. gjithashtu, edhe presioni nga SHBA, është më i madh se kurrë.
