Partia e Lirisë zhvillon konventën e parë të saj ditën e sotme, pasi i dha fund epokës së LSI më 25 korrik. Kreu i kësoj partie Ilir Meta ka folur para Konventës Kombëtare të kësaj force duke e cilësuar atë si një ditë shumë të rëndësishme për këtë forcë. Ai bëri të ditur se do të prezantohet programin dhe statuti i PL si dhe angazhimin që Shqipëria t’iu përkasë të rinjve.
“Është një ditë e rëndësishme sepse është konventa e parë e Partisë së Lirisë. Më 25 korrik ishte konventa e fundit e LSI-së e cila mori vendimin për t’i hapur rrugë krijimit të PL. Në më pak se 100 ditë vijmë në këtë konventë ku do të prezantojmë programin dhe statutin e PL si dhe angazhimin tonë që Shqipëria t’iu përkasë të rinjve.
PL ka këtë angazhim madhor që këta të rinj t’i mbajë këtu, t’i kthejë këtu dhe që të rinjtë tanë të jenë lokomotiva e transformimit të shpejtë dhe burimi i lumturisë dhe mirëqenies së shoqërisë sonë”, tha Meta.
Ndërkohë i pyetur në lidhje me kandidaturën e tij të vetme si kryetar i PL, ai e justifikoi me faktin se kjo tregon besimin që ka lidershipi tek ai.
“Prej 100 ditësh është bërë e ditur se do ketë zgjedhje për kryetar partie dhe strukturat, falenderoj komitetin organizator që përfundoi misionin. Sot do votohen të gjithë në mënyrë të fshehtë. Nuk shpikim dot kandidatë dhe nuk bëjmë gara fiktive. Tregues i besimit të anëtarëve në lidershipin tim. Do ta justifikoj me përgjegjësi maksimale. Do fuqizohet roli i të rinjve do jenë të përfaqësuar më shumë se 30 përqind në Struktura. Kudo në çdo nivel të rinjtë më të talentuar të jenë atje”, tha ai.
