Policia e Burgjeve ka ndërmarrë një seri kontrollesh të befasishme në disa institucione të vuajtjes së dënimit, përfshirë paraburgimet 313 dhe 302 në Tiranë.
Operacioni është shtrirë në të gjitha burgjet e vendit dhe synon jo vetëm identifikimin e sendeve të ndaluara, por edhe verifikimin e kartelave të takimeve të disa të dënuarve.
Gazetarja Klodiana Lala raporton se gjatë kontrolleve janë evidentuar shkelje serioze, ndërkohë që janë kryer edhe ndryshime në nivelet drejtuese.
Altin Agon është emëruar në krye të burgut të Peqinit, ndërsa Qazim Hoxha ka marrë drejtimin e IEVP Elbasan.
Ky aksion vjen pas skandalit të zbuluar në burgun e Drenovës, ku një kontroll i brendshëm nxori në pah shkelje të rënda të protokolleve të sigurisë.
Sipas raportit të Drejtorisë së Përgjithshme të Burgjeve, të dënuarit Laert Haxhiu, Orgest Bilbili dhe Anterio Kaloshi ishin sistemuar në të njëjtin sektor dhe në dhoma ngjitur, një praktikë që bie ndesh me masat e sigurisë për të dënuarit me rrezikshmëri të lartë.
Gjatë kontrollit në qelitë e tyre u sekuestruan katër telefona celularë, karikues dhe kufje bluetooth.
Dyshimet shkojnë edhe më tej, hetimet tregojnë se në ambientet e burgut mund të jenë futur femra për qëllime personale të Laert Haxhiut, duke thelluar akoma më shumë shkeljet.
