Autoritetet në Institucionin e Vuajtjes së Dënimit në Durrës zhvilluan një kontroll të papritur me qëllim parandalimin e futjes së sendeve të ndaluara brenda burgut.
Gjatë këtij operacioni u sekuestruan 10 telefona celularë. Dy prej tyre u zbuluan brenda qelive të të burgosurve, ndërsa tetë të tjerë u kapën në zonat jashtë ambienteve të brendshme të sigurisë, në tentativë për t’u futur në brendësi të burgut.
Ky operacion është pjesë e masave të ashpra për të kufizuar përdorimin e sendeve të paligjshme nga të dënuarit dhe për të siguruar rendin dhe qetësinë brenda institucionit penitenciar.
Kujtojmë se në këtë burg gjenden të arrestuar disa emra të politikës duke filluar nga Erion Veliaj, Jurgis Çyrbja, Lefter Koka apo Alqi Bllako.
