Në kuadër të operacionit “TURNI”, Agjencia e Mbikëqyrjes Policore dhe Seksioni për Hetimin e Krimeve Ekonomike e Financiare në DVP Durrës kanë arrestuar në flagrancë Inspektorin e Policisë, A. M., 21 vjeç, i dyshuar për “Shpërdorim detyre” dhe “Korrupsion pasiv i personave që ushtrojnë funksione publike”. Po ashtu, janë shpallur në kërkim J. K., 31 vjeç dhe D. M., 34 vjeç, të dyshuar për “Kontrabandë mallrash”, “Vjedhje në bashkëpunim” dhe “Korrupsion aktiv”.
Arrestimet lidhen me një ngjarje të ndodhur më 27 janar 2025, ku këta shtetas nxorrën një sasi të konsiderueshme nafte nga anija “AYAZANOYBYA” e sekuestruar në Porto Romano, Durrës. Hetimet zbuluan se Inspektori A. M. kishte lejuar nxjerrjen e naftës për një pagesë prej 10,000 euro, duke bashkëpunuar me J. K. dhe ekuipazhin e anijes.
Gjithashtu, janë proceduar në gjendje të lirë shtatë shtetas të tjerë, të dyshuar për veprat penale të kontrabandës dhe vjedhjes. Materialet janë referuar në Prokurorinë e Posaçme Kundër Korrupsionit dhe Krimit të Organizuar (SPAK) për hetime të mëtejshme.
