Ditën e sotme është nënshkruar memorandum bashkëpunimi mes parlamentit të Shqipërisë dhe Kosovës. Kuvendet e përbashkëta do të mbahen në një ditë feste, konkretisht më 28 nëntor.
Pasi nënshkruan marrëveshjet, kryetarja e Kuvendit të Shqipërisë Lindita Nikolla doli në një konferencë për shtyp me homologun e saj nga Kosova, Glauk Konjufca. Ai u shpreh se Serbia është armiqësore ndaj Kosovës ndërsa kjo e fundit nuk lëshon pe, ndonëse kërkon paqe dhe dialog. Konjufca shtoi se do të donin që së bashku me Shqipërinë të ishin brenda një kornize për gjykimin ndaj Serbisë në mënyrë që të mbrohen interesat e Kosovës.
Glauk Konjufca: Në jemi dy shtete, por jemi popull me një interes të përbashkët. Edhe zyrtarët politikë të Kosovës dhe Shqipërisë vazhdimisht kanë vepruar me këtë vetëdije kombëtare. Natyrisht që arritjet dhe bashkëpunimi është i thellë, por edhe sfidat janë serioze. Pas shkurtit bota është më e pasigurt. Por në të njëjtën kohë agresioni i papranueshëm mbi Ukrainën ka nxitur unitetin e botës demokratike. Serbia e Vuçiçit nuk ka ndryshuar në drejtim politik, por vetëm mjetet prej kohës së Millosheviçit. Të gjithë shqiptarët duhet ta dinë që Serbia është shumë armiqësore ndaj Kosovës. Mohon pavarësisë dhe së fundmi e patë sesi presidenti nuk heziton fare edhe për ta sfiduar kornizën e sigurisë në Ballkan përmes kërcënimit të Kosovës dhe dërgimit të trupave të armatosur brenda territorit të Kosovës. Ne duam që me Shqipërinë të jemi brenda një kornize sa i përket gjykimit për Serbinë. Kosova nuk ka rrugë tjetër veçse të mbrojë interesat. Ne jemi për paqe dhe dialog, por nuk do të lëshojmë pe. Por i gëzohemi edhe çdo arritje të Shqipërisë, siç është hapja e negociatave. Rrugën e kemi të njëjtë.
Ndër të tjera falënderoi Shqipërinë për mbështetjen ndaj Kosovës në çështje me rëndësi si liberalizmi i vizave. Konjufca shpreson që fundi i vitit do t’i gjejë shqiptarët e Kosovës me viza të liberalizuara.
Glauk Konjufca: Dua t’ju falënderoj për këtë mikpritje të ngrohtë. Kontributi dhe ndihma juaj janë për tu çmuar. Në çdo rast që ju jepet edhe në takime të niveleve të rëndësishme e ngrini vazhdimisht çështjen e Kosovës, duke i qëndruar siç keni qenë gjithnjë afër. Edhe sa i përket domosdoshmërisë së njohjeve të reja dhe të gjitha iniciativave të Kosovës për anëtarësim në institucione ndërkombëtare dhe evropiane. Edhe po ashtu edhe lobimi juaj i pandalshëm për liberalizimin e vizave të Kosovës. Përpjekje që po japin rezultatet e para. Qytetarët e Kosovës nuk kanë asnjë dyshim që fundi i vitit do ti gjejë me heqjen e këtij regjimi të padrejtë
