Ditën e sotme në KOngresin e Partisë Socialiste kryeministri Edi Rama ka propozuar që të mbahet një kongres llogaridhënieje në vjeshtë. Rama tha se do të ‘skanohen’ të gjithë kryebashkiakët. Sipas tij, çdo socialist do të tregojë se sa besim ka tek ai që ka mbi krye. Ai bëri krahasimin me deputetët dhe tha se ata shkojnë në çdo zonë për fushatë, ndryshe nga drejtuesit socialiste e për këtë arsye, duhet një llogaridhënie.
“Si mundet që një institucioni t’i dalë boja dhe në ta marrim vesh në fund të mandatit apo kur të humbasim zgjedhjet? Nga ana tjetër, kur shumë drejtorë nuk e luajnë rolin e tyre, por janë në rrethin e pushtetit të vogël atje dhe na ndajnë ne nga pjesa që janë më të rëndësishëm, vijmë në kongres këtu dhe diskutojmë rezultatet e shprehjes të të gjithë anëtarësisë. Të mos them që kjo duhet shtrirë përtej anëatrësisë. Çdokush që është anëtar partie duhet pyetur sa i kënaqur është nga një kryetar bashkie, nga një drejtues qarku apo nga ata që kanë mbi? Drejtuesit e qarqeve kanë një rol shumë të rëndësishëm dhe duhet të japin llogari në kongresin e llogaridhënies. Partia duhet pyetur edhe për deputetët, çfarë konsiderate kanë? Çfarë kontributi? Ne kemi deputetë që janë të shkëlqyer, njerëz që rrinë dhe e ndjekin çdo gjë në terren, rrinë aty deri në momentin që numërohet vota, shkojnë në reforma deri në zonën që shkon drejtuesi i qarkut, dhe për këtë duhet të bëhet llogaridhënie. Forcën tonë duhet ta masim me aftësinë për të dëgjuar çdo opinion. Të mbahet në vjeshtë një tjetër kongres,”_ tha Rama ndër të tjera.
