Një krim i rëndë në Librazhd tronditi vendin ditën e sotme, ku një grua u vra me sëpatë nga bashkëshorti i saj, ndërsa ky i fundit vari veten pas krimit të rëndë. Detaje tronditëse janë bërë me dije, ndërsa mësohet se Qemal dhe Menturie Bici kishin katër fëmijë. Ka qenë njëri prej tyre që gjeti trupat e pajetë të prindërve dhe më pas i shokuar ka njoftuar policinë.
Ngjarja ndodhi në fshatin Dragostunjë të Librazhdit, ku 56-vjeçari Qemal Bici goditi me sëpatë në trup e në kokë bashkëshorten e tij Menturie Bici dhe më pas u vetvarë në një pemë pranë banesës. Ndërkohë, mësohet se të dy kishin konflikte të vazhdueshme, që çuan në ngjarjen e rëndë. Policia njoftoi se është duke punuar për zbardhjen e rrethanave të krimit dhe dokumentimin e plotë të ngjarjes.
Njoftimi i policisë për ngjarjen:
Librazhd/ Informacion paraprak
Në fshatin Dragostunjë, Librazhd, në banesë shtetasi Q.B., rreth 56 vjeç, në rrethana ende të paqarta dyshohet se ka vrarë me mjet të mprehtë ( sopatë) bashkëshorten e tij shtetasen M.B., rreth 53 vjeçe dhe më pas ka varur veten.
Grupi hetimor nën drejtimin Prokurorisë ndodhet në vendgjarje dhe po punohet për zbardhjen dhe dokumentimin e plotë të rrethanave të ngjarjes.
