Një ngjarje e rëndë kriminale ka tronditur këtë pasdite zonën e Hasit, ku një 34-vjeçar është vrarë me armë zjarri në fshatin Pla, pas një konflikti mes dy fiseve. Viktima është identifikuar si Rushit Sallahu, ndërsa autori i dyshuar i vrasjes, Ylber Jaku, është arrestuar nga Policia pak minuta pas ngjarjes.
Sipas informacioneve zyrtare, vrasja dyshohet se ka ndodhur për motive pronësie. Një ditë më parë, midis fisit Sallahu dhe fisit Jaku kishte ndodhur një përplasje fizike ku janë përdorur edhe shkopinj, ndërsa sot përplasja përfundoi në tragjedi.
“Rreth orës 16:40, është marrë njoftim se në fshatin Pla, shtetasi Y. J., 41 vjeç, dyshohet se ka vrarë me armë zjarri shtetasin R. S., 34 vjeç, dyshohet për motive pronësie. Në vendngjarje shkuan menjëherë shërbimet e Policisë, si dhe Forcat e Posaçme “Shqiponja” të DVP Kukës, në mbështetje të Policisë lokale”, thuhet në njoftimin zyrtar të Policisë.
Pas ndërhyrjes së shpejtë, Policia ka mundur të arrestojë autorin e dyshuar Ylber Jaku dhe ka sekuestruar armën e zjarrit që dyshohet se është përdorur në krim.
Nën drejtimin e Prokurorisë vijojnë hetimet për dokumentimin e plotë të ngjarjes dhe sqarimin e rrethanave që çuan në këtë përfundim fatal.
