Policia e Durrësit ka ekzekutuar vendimin e Gjykatës së Posaçme për sekuestrimin e katër pasurive të paluajtshme të Alket Hatijas dhe familjarëve të tij.
Pasuritë përfshijnë një sipërfaqe toke truall, një garazh dhe dy apartamente, një në Durrës dhe një në Kavajë. Hatija, i njohur si “Zoti i drogës”, është i dënuar në Itali për trafik lëndësh narkotike, konkretisht heroinë, duke transportuar rreth 10 kg në çdo rast gjatë periudhës 2003-2004.
NJOFTIMI I PLOTË:
Sektori për Hetimin e Krimeve Ekonomiko-Financiare i DVP Durrës, në bashkëpunim me Agjencinë e Administrimit të Pronave të Konfiskuara dhe Sekuestruara, në kuadër të operacionit policor të koduar “Konfiskimi”, ka ekzekutuar vendimin e Gjykatës së Posaçme për Korrupsionin dhe Krimin e Organizuar, për konfiskimin e disa pasurive të paluajtshme të cilat ky shtetas i kishte regjistruar në emër të vet dhe të familjarëve të tij, konkretisht: 1 sipërfaqe toke truall, 1 garazh dhe 1 apartament në Durrës, si dhe 1 apartament në Kavajë.
Shtetasi Alket Hatija, gjatë periudhës 2003-2004, ka kryer veprimtaritë kriminale të mbajtjes, shitjes dhe trafikimit të lëndës narkotike heroinë, nga Shqipëria në Itali. Ai ka trafikuar nga Shqipëria në Itali, me bashkëpunëtorët e tij, nëpërmjet automjeteve të transportit ndërkombëtar, sasi të mëdha droge (rreth 10 kg heroinë për çdo rast). Materialet procedurale i kaluan Prokurorisë, për veprime të mëtejshme.
