Pasuri me vlerë tregu rreth 1 milion euro, të cilat janë në pronësi të shtetasit Redjan Rraja dhe personave të lidhur me të, janë konfiskuar dhe kaluan në pronësi të shtetit shqiptar. Pasuritë e sekuestruara përfshijnë 5 dyqane, dy automjete dhe një orë luksoze marke “Rolex”.
Dy dyqane ishin regjistruar në emër të Redjan Rrahjas, ndërsa tre të tjera në emër të Marsela Çiçës. Dy automjetet dhe ora Rolex ishin në emër të Kejvina Kthellës.
Seksioni për Hetimin e Pastrimit të Parave dhe Aseteve Kriminale, në bashkëpunim me Agjencinë e Administrimit të Aseteve të Sekuestruara dhe Konfiskuara, ka ekzekutuar vendimin e Gjykatës së Posaçme të Shkallës së Parë për Korrupsionin dhe Krimin e Organizuar nr. 05, datë 07.02.2024, i cili u la në fuqi nga Gjykata e Posaçme e Apelit më datën 23.10.2024.
Në zbatim të këtij vendimi, janë konfiskuar pasuri të luajtshme dhe të paluajtshme, përfshirë:
– Një njësi me sipërfaqe 30 m², në emër të shtetasit Redjan Rraja.
– Një njësi me sipërfaqe 76 m², në emër të Redjan Rraja.
– Një njësi me sipërfaqe 127.5 m², në emër të Marsela Çiçës.
– Dy njësi me sipërfaqe 18.09 m², gjithashtu në emër të Marsela Çiçës.
– Dy automjete, një në pronësi të Redjan Rrajës dhe një tjetër në emër të Kejvina Kthellës.
– Një orë dore Rolex.
Të gjitha këto pasuri, që kanë një vlerë totale rreth 1 milion euro, janë konfiskuar me qëllim kalimin në favor të shtetit dhe janë dorëzuar Agjencisë së Administrimit të Aseteve të Sekuestruara dhe Konfiskuara. Materialet e çështjes janë kaluar për ndjekje të mëtejshme në Prokurorinë e Posaçme Kundër Korrupsionit dhe Krimit të Organizuar.
