Varianti afrikan i koronavirusit është konfirmuar për herë të parë ditën e sotme në Kosovë. Lajmin e bënë të ditur Instituti Kombëtar i Shëndetit Publik në Kosovë (IKSHPK), i cili bën me dije se është konfirmuar rasti i parë me këtë variant.
IKSHPK në deklaratën e saj ka lajmëruar se pacienti është hospitalizuar dhe është duke u trajtuar në Klinikën Infektive të Qendrës Klinike Universitare të Kosovës (QKUK).
Ekipet hulumtuese të IKSHPK-së po gjurmojnë aktualisht të gjitha burimet e mundshme për të parandaluar përhapjen e mëtutjeshme të rasteve dhe implikimet e mundshme në shëndetin e njeriut.
“Duke qenë se tashmë rasti është kontaktuar, do të hulumtohen kontaktet për identifikimin eventual të rasteve të reja. Rastet e tilla të virusit mutagjen janë regjistruar tashmë në shumë vende të botës”, njofton IKSHPK.
Më tej në njoftim thuhet se masat parandaluese janë të njëjta dhe se personat të cilët rezultojnë pozitiv duhet të qëndrojnë në shtëpi dhe të zbatojnë me përpikmëri të gjitha udhëzimet e mjekëve. Gjithashtu sqarohet se me zvogëlimin e kontakteve do të bëhet e mundur ndërprerja e përhapjes së infeksionit.
“Masat parandaluese janë të njëjta. Personat të cilët rezultojnë pozitivë duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do të mundësohet ndërprerja e përhapjes së infeksionit”, theksohet në njoftim.
