Agjencia e Ushqimit dhe Veterinarisë ka konfirmuar rastin e parë të sëmundjes PPR në një fermë të blegtorisë në fshatin Landovicë, Komuna e Prizrenit. Sëmundja prek kryesisht delet dhe dhitë dhe është tejet ngjitëse mes këtyre kafshëve.
Pas raportimit të dyshimeve nga terreni, ekipet veterinarë të AUV ndërhynë menjëherë duke izoluar fermën, ndaluar çdo lëvizje të kafshëve dhe duke marrë mostrat për analiza.
Laboratori i Ushqimit dhe Veterinarisë ka konfirmuar pozitivitetin e virusit vetëm në fermën e Landovicës, ndërsa mostrat e mbledhura në zonën përreth rezultuan negative.
Bazuar në rezultatet laboratorike dhe legjislacionin në fuqi, AUV ka shpallur fshatin Landovicë si vater të infektuar dhe ka vendosur rreth saj një zonë mbrojtëse me rreze 3 kilometra, e cila është futur në karantinë të plotë.
Brenda këtij perimetri ndalohet lëvizja e kafshëve, qarkullimi i produkteve blegtorale dhe hyrje-daljet pa autorizim.
Masat në terren për frenimin e përhapjes përfshijnë:
• Izolimin dhe kontrollin e fermës së prekur
• Hetime epidemiologjike për të identifikuar burimin dhe kontaktet e mundshme
• Dezinfektim të fermës dhe mjediseve përreth sipas protokolleve veterinare
• Vendosjen e masave të rrepta biosigurie në fermat përreth
PPR është një sëmundje virale shumë ngjitëse që shkakton temperaturë të lartë, diarre, kollitje, pneumoni dhe mortalitet të lartë në delet dhe dhitë. Megjithatë, sëmundja nuk transmetohet te njerëzit dhe nuk përbën rrezik për shëndetin publik.
Për të parandaluar përhapjen e mëtejshme të virusit, AUV ka nxjerrë një vendim që zbatohet në rang shtetëror:
1. Ndalohen:
• Lëvizja dhe tregtimi i deleve dhe dhive nga fermat
• Shitblerja në tregjet e kafshëve të këtyre llojeve
2. Obligohen:
• Fermerët të njoftojnë menjëherë veterinarin për çdo ndryshim shëndetësor të kafshëve
• Praktikat veterinare të raportojnë çdo rast të dyshuar me PPR pranë AUV
• Kryerja e inspektimeve të menjëhershme dhe dërgimi i mostrave në laborator
• Groposja e kafshëve në rast konfirmimi të sëmundjes
• Komunat të përcaktojnë vendet për asgjësimin e kafshëve të infektuara
• Dezinfektimi i objekteve të prekura dhe zonave përreth
3. Përjashtimisht, lejohet lëvizja e deleve dhe dhive vetëm nga fermat e pastra drejt thertoreve të licencuara, me miratimin paraprak të inspektorit veterinar.
4. Tregjet e kafshëve: Urdhërohen të pezullojnë menjëherë pranimin e deleve dhe dhive në hapësirat e tyre.
5. Zbatimi dhe mbikëqyrja e masave: Do të kryhet në bashkëpunim nga AUV, komunat dhe Policia e Kosovës.
Ky vendim hyn në fuqi më 3 korrik 2025 dhe do të mbetet aktiv deri në një njoftim të dytë nga autoritetet.
