Një tjetër zhvillim i bujshëm ka ndodhur në Brazil, ku një gjykatës i Gjykatës Supreme ka vendosur masën e arrestit shtëpiak ndaj ish-presidentit Jair Bolsonaro.
Vendimi vjen pas thyerjes së një ndalese për përdorimin e rrjeteve sociale, duke thelluar përplasjet mes drejtësisë dhe ish-liderit të djathtë, tashmë nën hetim për përpjekje për grusht shteti pas humbjes në zgjedhjet e vitit 2022 përballë presidentit aktual Luiz Inacio Lula da Silva.
Gjykatësi Alexandre de Moraes akuzoi Bolsonaron për shkelje të vazhdueshme të urdhrave gjyqësorë dhe e akuzoi atë se po përdor influencën politike për të sfiduar sistemin e drejtësisë.
Ai urdhëroi që Bolsonaro të izolohet në shtëpinë e tij në kryeqytetin Brazilia, pa të drejtë për të pritur vizitorë përveç avokatëve, si dhe i ndaloi përdorimin e telefonit celular.
Masa e fundit erdhi pas një videoje të publikuar nga mbështetësit e tij, ku Bolsonaro shihet duke folur me të birin gjatë një tubimi, në kundërshtim të drejtpërdrejtë me urdhrin gjyqësor që ndalon çdo formë të komunikimit publik nga ana e tij. Gjykatësi paralajmëroi se çdo shkelje tjetër do të çojë në arrestim të menjëhershëm.
Përplasja ka marrë përmasa ndërkombëtare, pasi Shtetet e Bashkuara kanë reaguar ashpër, duke akuzuar gjyqtarin Moraes për abuzim me pushtetin dhe shtypje të opozitës politike.
Departamenti Amerikan i Shtetit publikoi një deklaratë të ashpër ku thuhej: “Lëreni Bolsonaron të flasë!”, ndërsa njoftuan sanksione ndaj Moraes, përfshirë ndalimin e hyrjes në SHBA dhe ngrirjen e pasurive të tij.
Reagimi më i fortë erdhi nga ish-presidenti amerikan Donald Trump, i cili e cilësoi procesin si të motivuar politikisht dhe vendosi tarifa ndëshkuese ndaj Brazilit, duke tronditur marrëdhëniet mes dy vendeve.
Ndërkohë, Bolsonaro dhe shtatë të tjerë janë në proces gjyqësor për përpjekje për të përmbysur rezultatin zgjedhor të vitit 2022. Prokurorët pretendojnë se ai kishte planifikuar të qëndronte në pushtet përmes mbështetjes së ushtrisë, një plan që dështoi pasi forcat ushtarake nuk u përfshinë.
Gjykimi pritet të përmbyllet brenda pak javësh dhe nëse shpallet fajtor, Bolsonaro mund të përballet me një dënim deri në 40 vite burg. Megjithëse aktualisht i është ndaluar pjesëmarrja në jetën politike, ai ka shprehur ambicien për t’u rikthyer në skenën politike në zgjedhjet presidenciale të vitit 2026.
