Mjeku Pëllumb Pipero ka folur lidhur me pandeminë e COVID-19. Pipero shprehet optimist dhe ndër të tjera shprehet i bindur se Shqipëria e kaloi fazën kritike nga pandemia. Për këtë Pipero i referohet numrit të ulët të thirrjeve nga pacientët e prekur me COVID. Nëse vaksinimet do të vijojnë me këto ritme brenda muajit qershor, thotë Pipero, do të çlirohemi nga Covid-19.
Mjeku në një intervistë për A2 i ka rekomanduar ekspertëve të komitetit, lehtësimin e masave anti-covid.
“Situata është shumë më mirë, brenda pritshëmrive tona. Kemi parë raportin e rasteve të reja të infektuara me tamponët, që është te 1-2%, dikur ishte 20-25%. Kemi parë raportin e rasteve të infektuara me ato të shtruara, që lëviz me 15 apo 20 herë dhe kemi parë raportin e rasteve të shëruar me ato aktive, që tregojnë se kemi një situatë shumë optimiste. Të shtruarit në spitale janë mbi 50 vjeç. Kemi edhe raste të rënda, por po përpiqemi të mos kemi më humbje jete. Në rast se vaksinimi që është kthyer në faktor kryesor të frenimit të pandemisë, ecën me këto ritme, gjysma e parë e qershorit do të vijë me imunitetin e tufës të arritur. Ka ardhur koha që Komiteti Teknik të rishikojë dhe lehtësojë masat shtrënguese javën që vjen apo në fillim të muajit tjetër”, tha mjeku Pëllumb Pipero.
