Ditën e sotme në Komisionin për Edukimin dhe Mjetet e Informimit Publik janë diskutuar pagat e pedagogëve, universiteti i Elbasanit dhe vaksinimi i studenëve si dhe lehtësirat që ministrja Evis Kushi paraqiti ditën e sotme. Ministrja debatoi me deputetin e Partisë Demokratike, Luçiano Boçin i cili kishte rezerva për universitin e Elbasanit, që sipas tij nuk ka pasur asnjë financim. Kushi iu drejtua duke i thënë se e gjithë deklarata që ai tha ishte propagandë.
Një tjetër propozim i ngritur nga Boçi ishte dhe falja e tarifave të studentëve në mënyrë që ti stimulonte ata për vaksinimin. Luçiano Boçi vuri theksin tek mungesa e financimit për degën e mësuesisë në Universitetin e Elbasanit. Ai theksoi se arsimimi ka humbur në Elbasan, Shkodër dhe në Gjirokastër, për shkak të mungesës së paketave financiare. Boçi i shtroi pyetjen ministres se Arsimit, se cilat janë paketat financiare për të shpëtuar arsimin e lartë.
Ndërsa kryetari i Komisionit, Agron Gjekmarkaj u shpreh se Shqipëria ka tarifa tepër të larta për studentët në krahasim me mundësitë ekonomike të vendit, si dhe paga shumë të ulëta për pedagogët, të cilët detyrohen të bëjnë nga 2-3 punë për të blerë libra apo për të udhëtuar për seminare akademike.
Ministrja u shpreh se tarifat e studentëve janë përgjysmuar, ndërkohë që u shpreh se paga e pedagogëve është në dorën e vetë universiteteve me ligjin e ri që i jep autonomi Arsimit të Lartë.
