Komisioni i Venecias ka bërë publik draft-opinionin sa i përket ligjit të Anti-Shpifjes, ku i sugjeron qeverisë shqiptare të rishikojë këtë paketë, pasi argumenton se ndryshimet e propozuara nuk janë reflektuar plotësisht.
Venecia këshillon autoritetet shqiptare që t’i përgjigjen kritikave dhe të përmirësojnë ligjet, si edhe përmbajtjet e legjislacionit të hartohen në bazë të praktikës së Gjykatës Europiane për të Drejtat e Njeriut.
Në draft theksohet gjithashtu se projekt-ndryshimet nuk janë gati për miratim në formën e tyre aktuale, pasi janë të paqarta dhe ka të ngjarë të shtypin diskutimin e lirë.
“Përbërja e AMA-s dhe Komiteti i Ankesave, i cili zgjidhet nga AMA në bazë të rregullave të hartuara nga AMA, mund të krijojë shqetësime të ligjshme për pavarësinë e këtyre dy organeve. Prania e përfaqësuesve të komunitetit të medias dhe shoqërisë civile që nuk janë të lidhur drejtpërdrejt me forcat kryesore politike, mund të jetë një hap që forcon pavarësinë e këtij organi. Së dyti, “është e paqartë nëse anëtarët e AMA-s dhe të Komitetit të Ankesave janë mjaftueshëm të pavarur nga industria e madhe e mediave, në bazë të rregullave për papajtueshmërinë dhe konfliktin e interesit”.
Komisioni i Venecias kritikon edhe gjobat e larta në rast të shkeljeve të ligjit nga mediat “online”, që variojnë nga 100 mijë deri në 800 mijë lekë.
Komisioni i Venecias kujton se sanksionet e rënda nuk duhet të zbatohen menjëherë; procedurat gjyqësore në raste të tilla duhet të kenë një efekt pezullues dhe gjykatat duhet të kenë fuqinë të rishikojnë përmbajtjen e vendimeve në kuadrin e procedurave të cilat ofrojnë garanci themelore të gjykimit të drejtë.
Në fund, Komisioni i Venecias inkurajon autoritetet shqiptare të mbështesin krijimin e një organi vetërregullues që funksionon në mënyrë efektive dhe që përfshin të gjithë aktorët përkatës në fushën e mediave.
Komisioni i Venecias do t’i dorëzojë autoriteteve shqiptare opinionin përfundimtar për Paketën-Antishpifje në datat 18-19 qershor.
Venecia vendosi të shtyjë me dy muaj draft opinionet për dy kërkesa të ardhura nga Shqipëria, atë të ligjit Anti- Shpifje dhe të emërimeve në Gjykatën Kushtetuese.
Ky vendim u mor për shkak të situatës së krijuar nga koronavirusi.
