Komisioni hetimor për koncesionet në shëndetësi vijon të prodhojë tituj lajmesh dhe spektakël, por ende nuk i afrohet qëllimit për të cilin u krijua. Ky komision në fakt, të rikthen pas në kohë, kur një tjetër komision u ngrit enkas, atëherë për trajtimin e të dhënave të sistemit “TIMS”. Në fakt, për ata që nuk e rikujtojnë, ai komision nuk arriti dot të dilte me një raport të përbashkët sa i përket të dhënave të sistemit ‘TIMS’, me votat e pozitës dhe opozitës që nuk u bënë bashkë. Gjithsesi aktorët e atij komisioni, “ia dolën” për të arritur në një pikë të përbashkët, e cila duhet theksuar se ishte shumë e rëndësishme për vet ata.
Ata i dhanë vetes një rrogë shpërblim, për shkak të lodhjes së madhe dhe orëve të stërgjatura të punës, për të hetuar atë se çfarë ndodhi me të dhënat e ‘TIMS’, por që në fund, askush nga qytetarët nuk mori një përgjigje, se çfarë ndodhi realisht me këto të dhëna. Në fakt, e njëjta histori duket se po përsëritet edhe me komisionin hetimor për koncesionet në shëndetësi. Zgjatja e mandatit të këtij komisioni duket se u shërbeu palëve për të vazhduar me retorikën politike, pa arritur asnjë përfundim të qenësishëm, ndërkohë që edhe anëtarët e këtij komisioni, ku i dihet, ndoshta nga ‘lodhja’ e madhe, mund t’i dhurojnë vetes një rrogë shpërblim, ose më mirë akoma, dy të tilla, për të kaluar edhe kolegët e tyre të komisionit hetimor të ‘TIMS’.
Gjithsesi ajo që i intereson qytetarëve, më shumë se sa retorikat politike, apo zgjatja e mandatit të këtij komisioni, është hedhja dritë mbi korrupsionin në koncesionet e sterilizimit dhe të check-up-it, që deri tani pak janë zbardhur. Askush nuk arrin të kuptojë pse duhet spektakël që një ish-zëvendësministër, me pranga në duar, të vijë të dëshmojë për një çështje që po hetohet nga Prokuroria e Posaçme dhe është në gjykim. Po aq të pakuptimta janë edhe dëshmitë e mjekëve, të cilët, të papërgatitur për shfaqje politike, nuk janë në vendin e duhur për të treguar të vërtetën përpara deputetëve që konfliktohen me njëri-tjetrin.
Në kohën kur shëndetësia shqiptare po kalon një periudhë të vështirë, të trashëguar dhe të përkeqësuar, në vend që të diskutohen planet për përmirësimin e situatës, debati politik mbivendoset mbi rëndësinë e jetës së shqiptarëve. Vlen të kujtohet se komisioni hetimor për koncesionet në shëndetësi, në mënyrë selektive, vendosi të hetojë vetëm për dy koncesione: atë të sterilizimit dhe check-up-it, duke amnistuar dy të tjera, atë të dializës dhe laboratorëve. Për këto të fundit po heton SPAK, por politika hesht, edhe pse dëmi është i njëjtë me dy të parët. Sytë për momentin janë nga Komisioni hetimor mbi koncesionet, të presim dhe të zbulojmë spektaklin e radhës…
