Kryeministri Edi Rama ka shkaktuar reagime të ashpra pas një deklarate të bërë gjatë fushatës elektorale, ku përdori termin “autik” në një kontekst përçmues ndaj kundërshtarëve politikë. Komenti u bë gjatë një fjalimi ku Rama, duke iu referuar alternativës mes Bashkimit Europian dhe siç e quajti “kënetës”, tha:
“Të zgjedhësh midis BE dhe kënetës, kënetën domethënë nuk je mirë, politikisht je autik, s’je mirë.”
Kjo deklaratë pason një tjetër moment të diskutueshëm një ditë më parë, kur kryeministri iu tha fëmijëve të kërkonin në Google foto të tij nudo, një tjetër rast që ka shkaktuar debat të gjerë në opinionin publik.
Deklarata e Ramës përbën një ndër rastet më të rënda të përdorimit të një termi që i përket një çrregullimi neurozhvillimor si formë fyerjeje në debatin politik. Autizmi nuk është një sëmundje, por një spektrum çrregullimesh që ndikon mënyrën e komunikimit, të ndërveprimit dhe të perceptimit të realitetit. Shumë njerëz me autizëm përballen çdo ditë me sfida të mëdha, përfshirë stigmatizimin dhe përjashtimin shoqëror.
Përdorimi i termit “autik” si sinonim i paaftësisë politike apo mendore nuk është vetëm etikisht i gabuar, por edhe thellësisht diskriminues. Kjo retorikë, veçanërisht kur vjen nga figura më e lartë ekzekutive në vend, nuk bën gjë tjetër veçse ushqen paragjykimet dhe përforcon ndarjen sociale ndaj personave me aftësi ndryshe.
Në një vend që aspiron të jetë pjesë e Bashkimit Europian dhe të përqafojë vlerat e tij themelore si barazia dhe përfshirja, është alarmante që një diskurs i tillë të vijë nga vetë kreu i qeverisë. Deklaratat e tilla nuk mund të kalojnë si “gafe” – ato janë shenja të një kulture politike që mbetet larg standardeve që shoqëria shqiptare synon të arrijë.
Duke etiketuar si “kënetë” çdo zgjedhje që nuk përputhet me vizionin e tij, Rama jo vetëm përçmon kundërshtarët politikë, por sfidon edhe të drejtën e qytetarëve për të zgjedhur lirshëm. Kjo lloj gjuhe nuk ndërton ura, por i djeg ato – duke e larguar shoqërinë nga fryma europiane e dialogut dhe respektit të ndërsjellë.
Në përfundim të deklaratës së tij, Rama shtoi edhe:
“Paguajtën lekët e dynjasë për të paguar Latifin. Më hidhen mua pse them gjysma e burrave janë çyrykë. Po ça të them, e them si metaforë, nuk është raport klinik. Për mua kush shkon në kënetë është gjysmak.”
Këto deklarata kanë ngritur shqetësim të thellë në publik dhe në opinionin profesional mbi diskursin politik në vend, duke e kthyer retorikën e fushatës në një debat të gjerë për respektin, etikën dhe standardet e lidershipit në një shtet që aspiron integrimin europian.
