Ministria e Shëndetësisë së Kosovës ka sqaruar qytetarët në lidhje me kombinimin e vaksinave të Covid-19. Në një njoftim zyrtar ministria ka bërë me dije se qytetarët kanë të drejtë të zgjedhin llojin e vaksinës me të cilën do vaksinohen, mes Pfizer dhe AstraZeneca, të vetmet që përdoren në Kosovë. Veç kësaj, qytetarëve iu është lejuar që prej fillimit të vaksinimit edhe kombinimi i vaksinave, që do të thotë se mund të bëjnë Pfizer të parën dhe AstraZeneca të dytën, ose anasjelltas. Njoftimi i plotë:
Ministria e Shëndetësisë i informon sërish qytetarët e vendit se ata që vaksinohen kundër COVID-19 kanë të drejtë të zgjedhin llojin e vaksinës të cilën do ta marrin prej dy llojeve të vaksinave të cilat përdoren në Kosovë si Astra Zeneca dhe Pfizer BioNTech. Gjithashtu, që kur ka filluar vaksinimi i qytetarëve në masë kundër COVID-19 (qershor 2021), qytetarëve u është lejuar, me rekomandim të Komitetit të vaksinimit edhe kombinimi i vaksinave, që do të thotë se dozën e parë mund ta marrin të vaksinës Astra Zeneca dhe të dytën Pfizer dhe anasjelltas.
Ditën e sotme Kosova raportoi një numër të lartë rastesh me koronavirus, 1006 raste nga 6784 testime të kryera. Prej fillimit të vaksinimit në të gjitha qytetet e Kosovës janë dhënë 539.752 doza të vaksinës.
