Kombëtarja shqiptare U-21 ka njohur ditën e sotme kundërshtarët për në kualifikueset e Euro 2023. Djemtë e Kombëtares U-21 do të përballen me Anglinë, Kosovën, Andorrën, Slloveninë dhe Çekinë.
Shorti i hedhur në selinë e UEFA-s, në Nion të Zvicrës, e vendosi Shqipërinë në Grupin G bashkë me Anglinë, Kosovën dhe Andorrën që kuqezinjtë i kishin rivalë edhe më parë në eliminatoret e Kampionatit Europian 2021, që përfunduan nëntorin e vitit të kaluar. Ndeshjet e grupeve të Europianit për moshën U-21 do të luhen duke filluar nga muaji mars 2021 e deri në qershor të vitit 2022, ndërsa ndeshjet e fazës play-off do të luhen në shtator të vitit 2022. Faza finale e këtij turneu do të zhvillohet në muajt qershor-korrik 2023.
Ndeshjen e parë shpresat e nisin me Andorrën, teksa një avantazh për ta është se këtë të fundit janë përballur edhe e njohin më mirë në fushë. Ndërkohë vlen të theksohet se pas një fushate të suksesshme në eliminatoret e Europianit të kaluar, kuqezinjtë u ngjitën këtë herë në vazon e katërt nga gjashtë në total së bashku me skuadra si Skocia, Uellsi, Hungaria, Finlanda, Irlanda e Veriut, Bosnje-Hercegovina, Bjellorusia dhe Maqedonia e Veriut. Paraqitjet e fundit pozitive të skuadrës së drejtuar nga trajneri Alban Bushi e kanë ngjitur Shqipërinë në renditjen e UEFA-s.
